«Նոյան այգի» մշակութային հիմնադրամը ծրագրում էՄասիսի լանջին Նոյան այգի կառուցել: Նախագիծը կնպաստի Հայաստանում զբոսաշրջության զարգացմանը: Այգին կկառուցվի այնպես, որ համարվի աշխարհի 8-րդ հրաշալիքը, որտեղ աշխարհի կրոնները կլինեն յուրահատուկ երկխոսության մեջ: Այս մասին լրագրողների հետ հանդիպման ժամանակ նշեց հիմնադրամի տնօրեն Ֆելիքս Ղարաբաղցյանը: «Արմենպրես»-ի փոխանցմամբ` Ֆելիքս Ղարաբաղցյանն ընդգծեց, որ ծրագրի հիմնական նպատակն է նպաստել մարդկության բարոյաքաղաքական երկխոսությանը և համաշխարհային հանրության միավորման գործընթացին` պահպանելով յուրաքանչյուր դավանանքի պատկանող մարդուն հոգեհարազատ` «բարություն, սեր, խաղաղություն» գաղափարները: «Մենք նախատեսում ենք Արարատի լանջին մոտ 600 հա հողատարածքի վրա կառուցել Նոյան այգին: Հիմնադրման պաշտոնական արարողության ժամանակ աշխարհի բոլոր երկրներից հավաքված հողերը միախառնվելու են Նոյան այգու հողին` խորհրդանշելով երկիր մոլորակի միասնությունը: Այն օրհնվելու է տարակրոն հոգևոր առաջնորդների կողմից: Նախատեսում ենք կառուցել նաև ճոպանուղի, ինչպես նաև այգու տարածքում լինելու են բոլոր երկրների մակետները, և զբոսաշրջիկները, այցելելով «Նոյան այգի», առնվազն երկու շաբաթում հնարավորություն կունենան ծանոթանալ երկրների ու նրանց հարստությունների հետ»,-ներկայացրեց Ֆելիքս Ղարաբաղցյանը: Նա նաև հավելեց, որ քրիստոնեությունը, իսլամը և հուդայականությունն իրենց սուրբ գրքերում ընդունում են Արարատ լեռան բարձունքից Նոյ նահապետի իջնելու իրողությունը, և այդ իսկ պատճառով նախատեսվում է ստեղծել կրոնների կենտրոնը: «

Նոյան այգի» մշակութային հիմնադրամի տնօրենի տեղեկացմամբ`2011 թվականի երրորդ հազարամյակի առաջին հարյուր տարին ՅՈՒՆԵՍԿՕ-ի կողմից հռչակվել է «Քաղաքակրթությունների երկխոսության դար», որը և ծնեց Նոյան այգու կառուցման գաղափարը: