«Լույս, որ սերունդ է կրթում»
Սպիտակի մշակույթի տանը հոկտեմբերի 5-ին տոնական ու ջերմ տրամադրություն էր տիրում։ Ուսուցչի միջազգային օրվա առթիվ համայնքի ղեկավար Քաջարի Նիկողոսյանը որոշել էր օրը դարձնել անմոռանալի՝ առանձնահատուկ ուշադրություն և ջերմ խոսքեր նվիրելով համայնքի մանկավարժներին։
Տոնական միջոցառումը սկսվեց հենց մշակույթի տան մուտքից, որտեղ համայնքի ղեկավարը անձամբ շնորհավորում էր մանկավարժներին՝ մաղթելով նրանց նորանոր հաջողություններ, ուժ և անսպառ նվիրում իրենց կարևոր ու պատասխանատու առաքելության մեջ։ Սպիտակ համայնքապետարանի հովանու ներքո Սպիտակի մշակույթի տանը տեղի ունեցավ «Լույս, որ սերունդ է կրթում» խորագիրը կրող տոնական համերգը։ Ներկաների օրը գեղեցիկ և բարձր տրամադրությամբ լցրեցին «Մի Սար» նվագախումբն ու պարախումբը՝ իրենց երաժշտական և պարային կատարումներով ստեղծելով ջերմ ու տոնական մթնոլորտ։
Միջոցառման ընթացքում խմբի գեղարվեստական ղեկավար և դիրիժոր Արևիկ Թանաշյանը համայնքի ղեկավարի կողմից արժանացավ շնորհակալագրի՝ իր նվիրված և արդյունավետ գործունեության համար։
Իր հերթին՝ տիկին Արևիկ Թանաշեանը շնորհակալություն հայտնեց համայնքի ղեկավար Քաջարի Նիկողոսյանին՝ ջերմ ընդունելության, հյուրընկալության և հարազատ դարձած Սպիտակ քաղաքում համերգային ծրագրով հանդես գալու գեղեցիկ հնարավորության համար։
Օրը ևս մեկ անգամ փաստեց, որ ուսուցչի առաքելությունը միայն գիտելիք փոխանցելը չէ․ ուսուցիչն այն լույսն է, որն իր գիտելիքով, սիրով ու նվիրումով ճանապարհ է բացում նոր սերունդների համար։
05.10.2026
